पुणे (प्रतिनिधी): शहरात महिलांकडील दागिने चोरून नेण्याच्या घटना वाढल्या आहेत. आळंदी रस्त्यावर दुचाकीवरील सहप्रवासी महिलेकडील चार लाखांचे दागिने असलेली पिशवी चोरट्यांनी चोरून नेल्याची घटना घडली. दागिने चोरणाऱ्या चोरट्याने धक्का दिल्याने दुचाकी घसरली. सुदैवाने या घटनेत दुचाकीस्वार पती आणि महिलेला गंभीर दुखापत झाली नाही.
याबाबत एका महिलेने विश्रांतवाडी पोलिस ठाण्यात फिर्याद दिली आहे. तक्रारदार महिला विश्रांतवाडीतील धानोरी भागात राहायला आहेत. महिलेच्या नात्यातील एकाचा विवाह समारंभ दिघी येथे होता. सोमवारी (दि. १६) विवाह समारंभावरून महिला आणि पती दुचाकीवरून घरी निघाले.
विवाह समारंभात परिधान केलेले चार लाख दहा हजारांचे दागिने पिशवीत होते. आळंदी रोडवर बोपखेल फाट्याजवळ रात्री दुचाकीस्वार चोरट्यांनी तक्रारदार महिलेकडील दागिने असलेली पिशवी चोरून नेली, अशी माहिती विश्रांतवाडी पोलिसांनी दिली. तपास पोलिस उपनिरीक्षक पद्मराज गंपले करत आहेत.
